انهاردة هشرح ليكم طريقة عمل السمنة البلدي بالصور والخطوات وهنتعلم كل مراحل الحصول على السمنة البلدي والمورته من الزبدة الفلاحى أو البلدى او النيوزيلاندي وكمان هيكون فيه شرح بالتفصيل في الفيديو اخر الوصفة كأنك في مطبخي فتابعوا معايا.
ساعات كتير بيكون عندنا زبدة ومحتاجين نحولها لسمنة زي العلب الجاهزة اللي بنشتريها فيرن او روتانا الحلوب.
طبعا الزبدة الفلاحى البلدى اللى بيكون لونها ابيض بيتم إستخراجها من ألبان الجاموس، أما الزبدة الصفراء فيتم إستخراجها من ألبان البقر.
انا بشتريها وأحفظها فى الفريزر، وعند الحاجة أقوم بإذابة الزبدة، وهى شئ أساسي عندى لأنها من لوازم العيد، وأستخدمها فى عمل الكحك والغريبة لذا فهى شئ أساسى.
المكونات والمقادير
هنا في الوصفة دي مفيش مقادير محددة.
- اي مقدار من الزبدة تفضلونه سواء كانت نيوزيلاندي او بلدي فلاحي حسب الرغبة.
- انا هنا استعملت زبدة بقري فلاحي حوالي 4 او 5 كيلو.
- ونحتاج رشة ملح فقط.
طريقة عمل السمنة البلدي والمورته
هنا شكل الزبدة البقري الفلاحي.
نحضر حلة كبيرة ويفضل ألومنيوم او اي نوع بس تكون لونها فاتح من الداخل علشان نلاحظ لون الزبدة وكمان يكون حجمها كبير علشان الزبدة لما تغلي يكون فيه مساحة تاخد راحتها.
نرفع الحلة علي نار عالية في الاول لحد ما تسيح بالشكل ده.
في المرحلة دي نخفض النار علشان ما تتحرقش الزبدة مننا ونلاحظها هتكون رغوة صفراء فاتحة علي الوش.
بالشكل ده هنسيبها علي نار متوسطة لحد ما نلاحظ ان السمنة بدأت تظهر والرغوة بتقل.
بالشكل ده وهتلاقوها بوضوح في الفيديو لما نرفع ملعقة من السمنة لو لاحظنا لسه فيها نقاط بيضاء وده الحليب يبقي لسه محتاجة وقت كمان على النار لحد ما يتبخر.
بهذا الشكل نبدأ نشيل الرغوة المتبقية علي جنب في طبق خارجي.
الي ان نحصل علي سمن صافي.
كما بهذا بالشكل ونتركه يبرد شوية ويهدى ونكون مجهزين برطمانات زجاج ناشفة خالص او علب السمنة المعدن الجاهزة.
انا هنا حطيتها في علب السمنة كانت عندي وكمان حطيت برطمان زجاج علشان تشوفوا لون السمنة ازاي نقي وفاتح.
وهنا في العلب.
نتركها تبرد تمام ولما تبرد بتمسك بالشكل ده.
وخصوصا لو الجو برد بتجمد.
دة شكلها زي الجاهزة واحسن كمان.
نحتفظ بيها في المطبخ عادي وتستخدم في الحلويات وفي الاكلات.
وباقي الرغوة اللي شيلناها قبل كدة مع الرواسب اللي في الحلة دي اسمها مورته.
نحطهم علي بعض تاني ونقلبهم علي النار.
لحد ما تاخد لون ذهبي شوية ونضعها في طبق وتؤكل بالخبز مع خيار وخس بتبقي روعة مشهورة عندنا في مصر.
ودي كانت وصفتنا ازاي نطلع السمنة والمورته من الزبدة.
شرح فيديو السمنة البلدي
وده فيديو طريقة عمل السمنة البلدي والمورته بالتفصيل كأنك في مطبخي اتمني ان ينال اعجابكم.