اكلات السمك كتير ومتنوعة واليوم هنعمل سمك قاروص سنجاري مشوي في الفرن روعة بجد وبخلطة تحفة جدا ولذيذة والشرح هيكون بالصور والخطوات وكمان شرح بالفيديو في اخر الوصفة كأنك في مطبخي يالا بينا نشوف مع بعض.
المكونات والمقادير
- كيلو ونصف سمك قاروص.
- 3 حبات طماطم مكعبات.
- 3 حبات فلفل اخضر مكعبات.
- 3 حبات بصل مكعبات.
- 4 فصوص ثوم مفروم.
- 3 حبات ليمون.
- حوالي كوب بقدونس مفروم.
- نصف كوب زيت.
تتبيلة السمك
- 10 فصوص ثوم مفروم.
- ملعقتين فلفل احمر مفروم حلو.
- ملح وكمون وليمون.
طريقة عمل سمك قاروص سنجاري مشوي
طبعا ننظف السمك ونقشره وننظفه من الداخل وانا هنا قاطعة الرأس كمان.
نخلط الثوم والكمون والفلفل الاحمر الحلو والليمون في المياه او ندقة بالمدق (الهون) حسب الرغبة ونتبل بيه السمك ونتركه جانبا.
نحضر خلطة الحشو للسنجاري.
هنجيب بولة ونضع فيها الطماطم والبصل والفلفل والبقدونس ونفرم الثوم عليها والملح وكمون وشطة حسب الرغبة.
نقلب جميع المكونات مع بعض ونعصر الليمون.
يتكون عندنا سلطة مشكلة بالشكل ده.
نحضر صينية فرن ونفرشها بورق الفويل ونضع شرائح بصل وطماطم ورشة كمون وملح ورشة زيت.
ونرص السمك وهو مفتوح كليا بالشكل ده.
نضع كمية السلطة كلها فوق كل حبة من حبات السمك.
بالشكل دة كل الكمية ونرش باقي الزيت.
نكون مشغلين الفرن علي درجة حرارة عالية ونغطي الصينية بالفويل ايضا ونضع الصينية في الفرن حوالي ساعة.
ولما يستوي نشيل الفويل ونشغل الشواية ونحمر الصينية الريحة بقي رائعة جدا وطعم ولا اجمل.
يقدم بالهنا مع أرز ابيض وطحينة حسب الرغبة لذيذ جدا.
شرح فيديو سنجاري السمك القاروص
وده فيديو شرح طريقة عمل سمك قاروص سنجاري مشوي وضحت فيه كل التفاصيل جربوها وهتحوز على اعجباكم.