انهاردة هشرح لكم طريقة عمل ملوخية مطبوخة بالصور والخطوات والشرح بالتفصيل فى الفيديو اخر الوصفة.
طبعا بنجيب الملوخية الخضراء ونقطفها فاكرين طريقة تخزين الملوخية اللي عملتها بالطريقة اللى هنا وممكن لو تحبى تخرطيها عادى بالمخرطة.
انا عن نفسى اختصارا للوقت بعملها بالطريقة دى (طريقة تخزين الملوخية) وعند الحاجة استعمل كيس الملوخية على طول.
المكونات والمقادير
- كيلو ملوخية بعد التجهيز.
- رأس كاملة ثوم مفروم ناعم.
- معلقة كزبرة ناشفة.
- شوربة فراخ أو لحمة او ارانب حسب الرغبة.
طريقة عمل الملوخية الخضراء المطبوخة
نضع الشوربة علي النار تغلي نبدأ بكمية صغيرة وبعد كدة لو احتاجت نزود في الاخر بعد الملوخية علشان تبقي مضبوطة مش خفيفة.
نضع معلقة من الثوم المفروم النئ داخل الشوربة وطبعا ملح وفلفل ولو حابين مرقة دجاج وربع معلقة صغيرة سكر بتضبط الطعم جدا.
ثم نضع الملوخية.
ونقلب كويس ونضبط الثقل اللي احنا عاوزينه تبقي بالشكل ده.
هانعمل بقي الطشة او التقلية بتاعت الملوخية.
نضع معلقة كبيرة او اكتر سمنة بلدي في طاسة علي النار ولما تسخن ننزل بالثوم المفروم الباقي ومعلقة الكسبرة ونقلب.
ونطشها علي الملوخية وتقدم بالف هنا هنا تحفة جدا ولذيذة.
ملحوظة الملوخية لازم اننا لا نضع غطاء الحلة عليها يعنى نتركها بدون غطاء لان لو غطينها هاتسقط يعنى الملوخية هتنفصل عن الشوربة وتقدم بالهنا.
شرح فيديو الملوخية المطبوخة
وده فيديو شرح طريقة طبخ الملوخية الخضراء بالتفصيل اتمنى ان ينال اعجابكم.