انهاردة هشرح لكم طريقة عمل السمنة والمورته فى المنزل بالصور والخطوات والفيديو فتابعوا معايا.
المكونات والأدوات
- زبدة بيضاء بلدي جاموسي اي كمية.
- رشة ملح.
- حلة.
السمنة زى ما كلنا عارفين انها من أهم متطلبات الكثير من الأكلات والحلويات فى البيت حيث تدخل ضمن مكوناتها، واليوم سأشرح لكم كيفية تحضير السمنة فى المنزل بالصور والخطوات.
طريقة عمل السمنة والمورته فى المنزل
طبعا علشان نحصل علي سمن بلدي جميل نحتاج الي كمية من الزبدة البلدي الجاموسي هي بتكون لونها ابيض بالشكل دة ورشة ملح فقط لا غير.
هنا انا كنت مفرزة الزبدة بطلعها احطها في حلة كبيرة وارش عليها الملح وارفعها علي النار علي نار متوسطة بالشكل دة هتبدأ تسيح.
بتعمل رغوة بيضاء كدة علي الوش وفي القاع بتعمل مورتة.
الرغوة البيضاء دي الحليب اللي في الزبدة بيبدأ يقل وتصفي.
لما بنلاقي ان الوش الابيض دة بدأ يقل والسمنة تظهر نخفض النار علشان ما تتحرقش.
ونبدأ نشيل الوش الابيض دة علي جنب.
الي ان تصبح السمنة صافية بالشكل دة.
اللي تحت دة المورتة.
نتركها تهدي وتبرد ونفضيها في برطمان او حلة صاج.
والمورته اللي تحت دي هنرجع نضيف عليها الوش الابيض اللي شيلناه.
ونقلبهم كويس علي النار لما تاخد لون شوية ونصفي السمنة اللي طلعت منها تاني.
بس نخليها لوحدها للخضار مثلا لان بيكون فيها رواسب من المورتة.
زي ما احنا شايفين وهنا دي شكل المورتة ممكن تتاكل وممكن يتعمل بيها المش.
وهنا دة شكل المورتة.
ودة شكل السمنة النهائي نقية جدا ومضبوطة.
لما بتبرد خالص بيتحول لونها للابيض بالشكل دة.
شرح فيديو المورته
وده شرح الفيديو الخاص بطريقة عمل السمنة والمورته في المنزل اتمنى ان يعجبكم.