انهاردة هشرح لكم طريقة عمل كفتة الأرز المطبوخة بالبطاطس وطريقة حفظها بالصور والخطوات والشرح بالتفصيل فى الفيديو بآخر الوصفة فتابعوا معايا.
مكونات كفتة الأرز
- 400 جرام لحمة مفرومة حمراء خالص مفيهاش اى دهون وده شرط اساسى لنجاح كفتة الأرز.
- 100 جرام أرز مطحون ناعم (فى ناس بتحط نفس كمية اللحمة أرز لكن انا بحبها كدة).
- بصلة متوسطة.
- 4 فصوص ثوم.
- كزبرة مفرومة ناعم.
- شبت مفروم ناعم.
- ملح وفلفل اسمر.
مقادير كفتة الأرز مطبوخة بالبطاطس
- مكعبات بطاطس.
- 2 ملعقة صلصة.
- عصير طماطم.
- 2 فص ثوم.
طريقة عمل كفتة الأرز بصوص الطماطم
فى الكبة نضع البصل والثوم والخضرة والارز ولو مش متوفرة الكبة.
ممكن نخلط كل المكونات ونفرمها فى الفرمة مرتين مثلا.
ونخلط الى ان يصبح ناعم ثم نضيف اللحم المفروم والتوابل ونخلط كويس جدا لازم نستمر فى الخلط الى ان تتكون عجينة متجانسة.
بتشبط بسيط فى اليد ندهن ايدينا زيت بسيط ونشكلها الى اصابع صغيرة.
بهذا الشكل الى ان تنتهى الكمية.
ودة شكلها بعد القلى في الزيت لازم ننشفها شوية بالشكل دة وممكن فى المرحلة دى نفرزها فى اكياس ونستخدمها عند الحاجة.
هنا انا حضرت صوص الطماطم هو المفروض يتعمل بثوم بس انا اكتفيت بالثوم اللى فى الكفتة علشان ما تكنش حامية.
عبارة عن طماطم مضروبة فى الخلاط مع صلصة ومعلقة كبيرة سمنة وتترك حتى تتسبك بالشكل دة.
ولما تتسبك نضيف ليها كمية من الماء والملح والفلفل الاسمر ونتركها تغلى.
واول ما تغلى نسقط الكفتة فيها على طول ونتركها تستوى وتتسبك شوية.
ودة شكل كفتة الارز بصوص الطماطم النهائى وبالهنا انا بحبها تقيلة شوية.
لكن لو تحبوا تسيبوها خفيفة شوية مفيش مشكلة حسب الرغبة وتقدم بالهنا مع ارز ابيض مصرى.
طريقة عمل كفتة الأرز المطبوخة بالبطاطس
لما نيجي نطبخ بقي كفتة الأرز بنضيف معاها مكعبات بطاطس زي دي من عندي.
هنحتاج الي كمية من عصير الطماطم مع معلقتين صلصلة وفصين ثوم وممكن من غير ثوم حسب الرغبة.
نضربهم كلهم مع بعض في الخلاط.
ونحضر حلة نضعها على النار ونضع معلقة كبيرة سمنة ولما تسخن ننزل بعصير الطماطم.
نسبك صوص الطماطم ونحمر الكفتة في زيت.
لما الصوص يتسبك ننزل الكفتة في الصوص ونزود ماء ونتركها تستوي.
وقبل ما اطفي عليها بنصف ساعة بضيف البطاطس.
ونضبط الملح والفلفل وتتسبك وتقدم بالهنا مع أرز ابيض.
شرح فيديو كفتة الارز
وده شرح بالفيديو لطريقة عمل كفتة الأرز بالصوص الاحمر او صوص الطماطم.
ودي طريقة عمل وصفة كفتة الأرز المطبوخة بالبطاطس بالفيديو.