اليوم سأشرح لكم طريقة عمل أوراك الدجاج المحشية بفكرة جديدة بالصور والخطوات والتفصيل فى الفيديو اخر الوصفة.
الاكلة دى بيسموها الحمام الكداب لانة فى الاصل مش حمام هى عبارة عن صدور واوراك الدجاج المخلية وبنحشيها بنفس فكرة الحمام وبيكون شكلها زى الحمام بس الطعم بصراحة خطير جدا ياريت تجربوها وطبعا ليها اكتر من طريقة طبخ بس دى طريقتى وطلعت حلوة جدا.
المكونات والمقادير
طبعا مش ثابتة تقربية نحتاج الى:
- اوراك دجاج مخلية ومدقوقة وبدون جلد.
- طماطم مكعبات.
- بصل مبشور او مكعبات.
- بقدونس مفرومة.
- لحمة مفرومة.
- ربع كوب أرز.
- ملح وفلفل.
- عصير بصل بالليمون.
طريقة عمل أوراك الدجاج المحشية
انا هنا عملتها بأوراك الفراخ وهنا ده شكل الاوراك وهى مخلية ومدقوقة.
نبدأ نشوح اللحمة المفرومة مع البصل وفلفل اسمر ثم الطماطم وباقى الخضرة والأرز.
ونزود ماء شوية بسيط ونتركهم يستو نصف سواء وطبعا نضيف ملح.
ودة شكلهم بعد ما استوا شوية وكدة اضمن علشان تكون المكونات شبة مستوية.
هنا نبدا نحشى الاوراك او الصدور.
ونلفها كويس ونقفلها بالعود الخشبى طبعا الأرز شبه مستوى فبيمسك فى بعض مش هيقع بس اقفلوها على قدر الامكان ولما تستوى هاتمسك كلها ونسحب العود منها.
وهنا شكلها بالعكس هنا بقى زى شكل الحمام اهو بس كداب وهيدخل النار ههههههههه.
نجيب حلة تيفال او طاسة تيفال غويطة ونضع معلقة سمنة ونشوحهم كويس الى ان ياخد اللون الذهبى.
طبعا احنا لسة ما حطناش على الفراخ اى ملح ولا فلفل هنا بقى نعمل عصير البصل بالليمون والطريقة 3 بصلات فى الخلاط مع 2 ليمون كبار عصيرهم فقط وكوب كبير ماء ونضربهم فى الخلاط ونصفيهم بالمصفاة وبكدة يكون عندنا عصير بصل بالليمون نزود ملح وفلفل ونصبة على الاوراك.
ونتركها تستوى كويس جدا لما ولو احتاجت مياه زيادة تزودى مفيش مشكلة ونغطيها طبعا لما بتستوى بيكون ليها صوص جميل كدة.
نعمل لها فحمة علشان تاخد طعم الشواء ونشيل الأعواد الخشبية ودة شكلها من قريب.
شرح فيديو أوراك الدجاج المحشية
وتقدم بالف هنا مع أطباق أخرى وده شرح وصفة أوراك الدجاج المحشية بالفيديو يا رب تعجبكم.