وصفة اليوم من انواع المحاشي وانهاردة هشرح لكم طريقة عمل محشي كوسة باللحمة المفرومة بالصور والخطوات وكمان شرح بالفيديو في اخر الوصفة كأنك في مطبخي فتابعوا معايا.
هنا الاكلة دى عبارة عن محشي كوسة بالطريقة العادية ولكن مضاف الى الخلطة اللحمة المفرومة نيئ في نيئ وطعمها رائع جدا ولذيذ وشهى نشوف المقادير مع بعض.
المكونات والمقادير
- 2 كيلو كوسة.
- نصف كيلو لحم مفروم.
- نصف كوب أرز ابيض.
- 2 طماطم مبشورة.
- 1 بصلة مفرومة ناعم.
- كوب بقدونس وكزبرة خضراء مفرومين.
- ملح وفلفل.
- كزبرة ناشفة.
- بابريكا.
- 3 ملعقة كبيرة زيت.
- شوربة لحم للتسوية وممكن استبدالها بماء مغلي مع مكعبين مرقعة دجاج حسب الرغبة.
طريقة عمل محشي كوسة باللحمة المفرومة
في بولة هنخلط كل المقادير اللحمة المفرومة النيئة مع الارز ويكون منقوع قبلها ومغسول ومصفي مع الخضرة مع الطماطم والبصل والتوابل والزيت.
كل المكونات مع بعض ونخلطها جيدا.
نفرغ الكوسة من القلب (نقورها) ونقشرها بسيط من الخارج ونغسلها جيدا.
نحضر الحلة اللي هنسوي فيها الكوسة نضع شرائح طماطم في قاع الحلة.
ونبدأ نحشي الكوسة واحدة واحدة ونترك ربعها فاضي او ما يعادل عقلة الاصبع.
حتي لا يخرج الحشو خارجها عند النضج.
وهكذا الي ان ننتهي من كل الكمية انا بحب ارصها واقفة في الحلة بالشكل ده.
نغلي الشوربة وطبعا تكون متبلة بملح وفلفل وممكن كمان ملعقة فلفل احمر مفروم.
ونسكبهم فوق محشي الكوسة الي حوالي ثلاثة ارباع الكوسة ونضعها علي النار الي ان تنضج وتقدم بالهنا.
لذيذة جدا جدا وطعم مختلف للحشو النئ في نئ مع اللحمة المفرومة.
شرح فيديو محشي الكوسة
وده فيديو شرح طريقة عمل محشي كوسة باللحمة المفرومة وضحت فيه كل التفاصيل جربوها وهتحوز على اعجباكم.