السينامون رولز ناس كتير بيسموها سينابون هى أسمها سينامون بالميم وليس الباء، وانهاردة انا هشرح لكم طريقة عمل السينامون رولز مع صوص الكريم تشيز الرائع والشرح كامل بالصور والخطوات، اما الشرح التفصيلي كأنك فى مطبخى بالفيديو فى اخر الوصفة.
وصفتنا اليوم تتكون من 3 مجموعات من المقادير وهى مقادير العجينة ومقادير للحشو ومقادير الكريم تشيز.
لكن باذن الله لو اتبعتوا المقادير بالتفصيل وخطوات العمل هتحصلوا علي سينامون رولز احسن من الجاهز بكتير وطعم غني جدا ورائع وهو نوع من الحلويات يقدم دافئ بطعم القرفة لكن رائع جدا.
مقادير عجينة السينامون رولز المرحلة الاولى
- 2 كوب ماء فاتر.
- 2 كوب دقيق منخول.
- 1 معلقة كبيرة خميرة فورية.
- 2 معلقة كبيرة حليب بودرة.
- معلقة صغيرة سكر.
- ربع معلقة صغيرة ملح.
مقادير عجينة السينامون المرحلة الثانية
- ثلث كوب زيت.
- بيضة.
- من 3 ل 4 اكواب دقيق منخول حسب العجينة ما تلم.
مكونات حشو السينامون رولز
- 10 ملعقة كبيرة قرفة ناعمة.
- 5 ملعقة كبيرة زبدة لينة.
- 5 ملعقة كبيرة سكر بني.
مقادير الكريم تشيز
- معيار فنجان شاي لبن بودرة.
- معيار فنجان شاي بودرة كريم شانتي خام.
- 3 ملعقة كبيرة سكر بودرة.
- معلقة كبيرة زبدة لينة.
- فانيليا.
- حوالي 200 جرام جبنة كريمي او 8 مكعبات جبن كيري.
- كوب حليب مثلج او ماء مثلج حسب الرغبة.
مقادير ومكونات التزيين
- كراميل صوص وعين جمل اختياري.
- الكمية تكفي لعمل من 15 ل 16 قطعة سينامون كبيرة.
طريقة عمل السينامون رولز بصوص الكريم تشيز
الاول هنعجن مقادير المرحلة الاولي نخلطها مع بعض.
بيكون خليط سائل بالشكل ده نغطيها ونتركها تخمر عشر دقايق تصبح بالشكل ده.
نضيف مقادير المرحلة الثانية عليها كلها مرة واحدة لكن الدقيق حسب الحاجة.
ونعجن الي ان نحصل علي عجين طري لا يلتصق باليد وناعم وجميل.
نغطيها ونتركها تخمر ودي اول مرة تخمير للعجين.
نحضر الكريم تشيز الصوص الابيض
نضع كل المكونات مع بعض مرة واحدة في وعاء الخلاط ونتحكم في سمك الصوص باضافة السائل سواء الحليب المثلج او الماء المثلج.
نخلط حتى نحصل علي خليط كريمي رائع.
بعد ما العجينة خمرت نفردها الي مربع كبير انا قسمتها الي 2 كرة كل كرة عملت بيها رول عمل 8 قطع سينامون.
ناخد اول كرة ونفردها علي سطح مرشوش بالدقيق الي مربع كبير.
سمك المربع رفيع حوالي نصف سم وندهنه كويس بالزبدة اللينة حسب ما ياخد معاكي.
ثم نرش عليه السكر البني.
ثم نرش قرفة كويس جدا.
ونبدأ نلف المربع الي رول بالشكل ده مع عدم الضغط عليه ونلف بخفه.
بالشكل ده.
نحضر خيط ونبدأ نقسم الرول الي قطع متساوية ونقطع.
ونقطع بالخيط نضع الخيط من تحت العجينة ونشد اليد عكس بعض كما هو موضح في الفيديو.
ودة علشان نحافظ علي شكلها ما ينفعش سكين.
ناخد الوحدات ونرصها علي صاج فرن مدهونة بسيط جدا زيت ونرصها واقفة بالشكل ده والطرف تحت.
ونترك مسافة صغيرة بين الوحدات للخمر فقط وحتى تحتفظ بالشكل الدائري لها.
ونغطيها ونتركها تخمر بالشكل ده.
ونخبزها في فرن ساخن علي درجة حرارة 180 لمدة نصف ساعة ومنخلهاش تحمر قوي.
ودة شكلها بعد ما استوت بتكون دائرة جنب بعض كده بس سهل نفصلهم اول ما تخرج نشيلها من الصينية مباشرة.
وتقدم بإضافة صوص الكريم تشيز عليها وصوص كراميل وقطع من عين الجمل بالشكل ده اللى في الفيديو وتقدم بالهنا.
شرح فيديو السينامون رولز
وده فيديو شرح طريقة عمل السينامون رولز بصوص الكريم تشيز وضحت فيه كل التفاصيل جربوها وهتحوز على اعجباكم.