انهاردة هشرح لكم طريقة عمل شوربة الكوسا بالكريمة (كوسه) اللي مش بيحب الكوسة هيأكلها في الشوربة وهشرحها ليكم بالصور والخطوات هنا وكمان شرح بالفيديو في اخر الوصفة كأنك في مطبخي فتابعوا معايا.
وعايزة انوه ان للكوسا طرق كتابة متنوعة وعديدة فهناك من يكتبها كوسا، وآخرون يكتبونها كوسه أو كوسى، وشوربة الكوسا بالكريمة من انواع الشوربات المختلفة الخفيفة والمفيدة وسهلة فى التحضير جدا وطعمها لذيذ ومفيدة للناس اللي مش بتحب تاكل الكوسا كخضار لو عملتوها شوربة بطريقتي هتحبوها جدا ونكون استفدنا بقيمتها الغذائية.
نشوف المقادير والطريقة مع بعض.
المكونات والمقادير
- 2 كوب كوسا مبشورة.
- ربع كوب كريمة طبخ.
- 2 كوب شوربة.
- مكعب ماجي.
- بصلة مفرومة ناعم.
- ربع كوب كزبرة خضراء مفرومة.
- ملح وفلفل.
- ملعقة كبيرة دقيق.
طريقة عمل شوربة الكوسا بالكريمة
في حلة علي النار نضع ملعقة سمنة او زبدة ونشوح البصلة الي ان تصفر لونها.
ننزل بالكزبرة المفرومة ونقلب.
ثم الكوسا المبشورة ونشوحها كويس.
ثم نضيف الدقيق ونقلب.
وبعد كده نضيف الشوربة سواء شوربة لحم او دجاج او ماء مذوب فيه مرقة ماجي مكعبات حسب الرغبة.
نقلبها ونتركها تستوي كويس طبعا مش بتاخد وقت وهي بتستوي بسرعة ونضيف الملح والفلفل الاسود.
ثم نخفقها بالهاند بلندر او نضربها في وعاء الخلاط حسب الرغبة.
تصبح بهذا الشكل بعد الخفق.
في المرحلة دي ننزل بالكريمة ونتركها تاخد غلوة ونطفئ النار.
تقدم بالهنا سهلة جدا في التحضير وطعم خرافة.
وفي التقديم انا زينتها بنقاط من الكريمة وورقة كزبرة.
وده فيديو شرح طريقة عمل شوربة الكوسا بالكريمة وضحت فيه كل التفاصيل جربوها وهتحوز على اعجباكم.