انهاردة هشرح لكم طريقة عمل الكرواسون علي الطريقة الاصلية الفرنسية بزبدة التوريق بالصور والخطوات وان شاء الله هعمله تاني بزبدة عادية علشان لو مش متوفر زبدة توريق ممكن اي زبدة عادي والشرح بالفيديو فى اخر الوصفة فتابعوا معايا.
مكونات ومقادير عجينة الكرواسون
- 500 جرام دقيق.
- 80 جرام زبدة.
- معلقتين كبار سكر.
- معلقة كبيرة خميرة.
- ربع معلقة صغيرة ملح.
- معلقة كبيرة خل.
- 1 بيضة.
- كوب ماء للعجن.
مقادير التوريق
- 250 جرام زبدة.
طريقة عمل الكرواسون
نخلط المقادير كلها مع بعضها ونعجن بالماء حسب ما تاخد معاكي وتكون العجينة طرية لكى لا تلتصق باليد.
ونغطي العجينة بعد ما تخلص ونتركها تخمر.
نفرد الزبدة اللي هنستعملها في التوريق في كيس ثلاجة ونفردها مستطيل ونضعها تتماسك في الثلاجة.
نفرد العجينة علي دقيق بشكل مستطيل يكون ضعف حجم الزبدة.
ونضع الزبدة في المنتصف بالشكل ده ونطوي طرف العجين الي نصف الزبدة.
ثم نطوي الطرف الاخر الي النصف الاخر للزبدة.
ونغلق الوسط كويس جدا.
ثم نفرد العجين بالطول الي مستطيل الاول واحنا بنفرد بنخبط بالنشابة العجين موضح في الفيديو هنا بالتفصيل حتي تكون سهلة في الفرد لان الزبدة باردة. نفرده مستطيل ونقوم بطيه.
يطوي بالشكل ده الثلث الاول ثم الثاني عليه.
والباقي عليه.
ويغلف ويوضع في الثلاجة هنكرر الحركة دي 4 مرات بين كل مرة والثانية توضع العجينة في الثلاجة من نصف ساعة لساعة وهكذا.
ثم اخر مرحلة هتكون الطبقات اتكونت هنفرد العجين الي مستطيل طويل حوالي 70 سم × 28.
ونساوي الاطراف ثم يقطع الي مثلثات متساوية حسب الحجم اللي تحبية انا هنا قطعته قاعدة المثلث 4 سم.
ناخد مثلث مثلث ونقوم بلفه من القاعدة الي القمة بالشكل ده.
الي ان نحصل علي كرواسون منتظم الشكل ويكون الطرف النهائي تحت.
يرص علي صينية مدهونة بسيط زيت ويترك يخمر.
مع ترك مسافات بين القطع لانها لسه هتنتفخ مرتين مرة في التخمير ومرة في الفرن لان الطبقات هتفتح وهتورق.
ندهن الوجه بيض مع نسكافية وخل.
وندخلة الفرن علي درجة حرارة 200 حوالي 20 دقيقة علي الرف الاوسط.
وده بيكون شكلة النهائي ولو حابين نحشيه بنحشيه قبل مرحلة اللف سواء شيكولاته قطع او جبن.
ويقدم بالف هنا.. ناجح جدا ومورق.. والكمية عملت معايا 13 واحدة كرواسون حجم متوسط أقرب للكبير.
شرح فيديو عمل الكرواسون الفرنسي
وده فيديو شرح طريقة عمل الكرواسون الفرنسي اتمنى ان ينال اعجابكم.