انهاردة هشرحلكم طريقة عمل كوكتيل الفاكهه مميز جدا ولذيذ خوخ وعنب وكريز بالصور والخطوات والشرح بالفيديو كأنك فى مطبخى اخر الوصفة فتابعوا معايا.
كوكتيل الفواكه طبعا مفتوح تستخدمي نوع الفاكهة المفضل عندك انا هنا هستعمل 3 انواع وهي الخوخ والعنب الاحمر والكريز.
المكونات والمقادير
طبعا نسبيا المكونات والمقادير بتكون مفتوحة في الكميات وبالنسبة للكميات اللى انا عملتها كانت كالاتي:
- نصف كيلو خوخ متنظف ومقشر ومنزوع النوي.
- نصف كيلو كريز منزوع النوى.
- ربع كيلو عنب احمر.
- نصف كيلو سكر عادي.
- فانيليا.
- لتر ماء.
طريقة عمل كوكتيل الفاكهه خوخ وعنب وكريز
هنا انا قطعت الخوخ وطبعا قشرته الاول ونزعت النوي وقطعته مكعبات بالشكل ده.
والكريز غسلته ونزعت النوي منه بجهاز يدوي لنزع النوي موضح في الفيديو.
نضع لتر الماء مع نصف كيلو سكر علي النار يغلي ثم نضيف الفاكهة كلها.
ونتركها تغلي خمس دقائق هيتكون رغوة بيضاء علي الوجه نشيل الرغوة دي كلها.
ونضع الفانيليا يا دوب خمس دقايق ونطفي النار.
ملحوظة لو حبيتي تزودي السكر عن النصف كيلو مفتوحة حسب رغبتك علي حسب كمية ونوع الفاكهة المستخدمة.
يترك يبرد ويصب في طبق عميق او بولة خشاف ويوضع في الثلاجة ويقدم بارد لذيذ جدا.
الكمية تكفي لعمل كيلو ونصف كوكتيل مشكل ويقدم بارد.
شرح فيديو كوكتيل الفواكه
وده فيديو شرح طريقة عمل كوكتيل الفاكهه وضحت فيه كل التفاصيل جربوها وهتحوز على اعجباكم.