النهاردة هنشرح طريقة عمل مخلل الزيتون والليمون فى المنزل بالصور والخطوات بطريقة سهلة جدا فتابعوا معايا.
المكونات والمقادير
- 1 كيلو زيتون.
- 1 كيلو عصير ليمون (ليمون مقشر منزوع البذر).
- 7 حبات قرون شطة خضراء.
- 2 فص ثوم.
- 1 كيس ملح.
- ⅛ كيلو شطة حمراء مفرومة.
- 2 عود كرفس أو كسبرة
طريقة عمل مخلل الزيتون
هنا ده شكل الزيتون بيسموه عندنا فى مصر تفاحى انا بقوم بشقه بالسكينة بالشكل ده.
بعد ما شقيته كله اقوم بنقعه فى ماء وملح لمدة اسبوع مع مراعاة تغيير الماء مرتين فى اليوم لكى نتخلص من المرارة.
بعد الاسبوع هنا شكل الزيتون ونحتاج الى قرون شطة خضراء.
لعمل الخلطة نحتاج الى حوالى كيلو ليمون مقشر ومنزوع البذور وكيس ملح وشطة حمراء مفرومة وفصين ثوم وعودين كرفس ان وجد او كسبرة.
نرص الزيتون فى برطمانات مع وضع قرون الشطة بشكل عشوائى.
وهكذا الى ان ننتهى الكمية.
نحضر وعاء الخلاط ونضع الشطة الحمراء والثوم والكرفس او الكسبرة والليمون ونملأه بالماء ونخلط.
الى ان نحصل على عصير ليمون بالمكونات السابقة نسكب فيه الملح.
ونقلب ثم نسكبه على الزيتون فى البرطمانت حتى تمتلئ.
ونضع على الوجه زيت لحفظه وتغلق البرطمانات وتوضع على صينية فى المطبخ لانه ممكن يفور شوية فى الاول يترك الى ان يتخلل لمدة لا تقل عن 15 الى 20 يوم.
ويقدم بالف هنا.