انهارده هشرح لكم طريقة عمل البط المحشي فريك مشوي في الفرن والشرح هيكون بالصور والخطوات، وكمان فيه شرح بالتفصيل بالفيديو للبط المشوي وحشوه كأنك في مطبخي في اخر الوصفة فتابعوا معايا.
المكونات والمقادير
- بطة كبيرة بتكون حوالي 2 كيلو بعد التنظيف وطبعا الحجم حسب الرغبة.
- نصف كيلو فريك.
- نصف كيلو لحم مفروم او ممكن 300 جرام حسب الرغبة.
- بصلة مبشورة.
- حبة واحدة طماطم مبشورة.
- 2 حبة بصل مقطع قطع كبيرة.
- 2 حبة طماطم مقطعة قطع كبيرة.
- عدد 2 حبة جزر مقطع.
- ملح وفلفل.
- بصل بودر.
- ثوم بورد.
- بابريكا.
- قطعة زبدة صغيرة مقدار ملعقة كبيرة.
- مكعب مرقة.
طريقة عمل البط المشوي المحشي
اولا نحضر خليط النقع ننقع فيه البطة للتخلص من اي رائحة زفارة..
وهو عبارة عن كمية وفيرة من الماء وملح وشرائح ليمون وعصير ليمون وورق لورة.
ننقع فيه البطة اقل شئ ساعة فيما فوق.
نبدا بتحضير الحشوة. هنا ده شكل الفريك المستخدم.
نقوم بغسل الفريك بالماء ونتركه جانبا.
في حلة علي النار او طاسة كبيرة نضع ملعقة سمنة وننزل باللحمة المفرومة.
مع الطماطم والبصل المبشور ونشوح الي ان يتغير لون اللحمة.
نضيف الفريك بعد ما يتم تصفيته من الماء ونشوحه كويس مع الخليط السابق.
ونضيف التوابل والملح. ونقلب جيدا الي ان تختلط كل المكونات مع بعضها.
نرفع الخليط من علي النار ونتركه الي ان يبرد.
وهنا شكل البطة بعد ما صفيناها من ماء النقع.
نبدأ بحشو البطة من الداخل بخلطة الفريك باللحم.
ثم نغلق البطة من تحت ببصلة كبيرة صحيحة بالشكل ده.
نمسح البطة من الخارج بالزبدة ونضع حول البطة مكعبات الجزر والبصل والطماطم.
نرش رشة توابل علي الخضار ونغطي الصينية بورق زبدة في الاول ثم بورق فويل.
توضع البطة في فرن ساخن وفيه قاعدة ناخدها في تسوية البطة ان كل كيلو من البطة بياخد ساعة سواء يعني دي اخدت مني ساعتين في الفرن عشان هي 2 كيلو.
باقي خليط الحشو هنزود عليه مكعب مرقة ونصف كوب ماء ونتركه يستوي عشان هنقدمه مع البطة.
ونتركها تستوي بالشكل ده زي الأرز.
وبعد ما البطة تستوي انا عملتلها فحمة بتدي طعم جميل جدا.
هنا شكل البطة بعد ما استوت.
قدمتها مع الفريك المستوي بالشكل ده.
وهنا شكل الفريك اللي داخل البطة مستوي كويس جدا. وتقدم بالهنا.
شرح فيديو البط المحشي والمشوي
وده فيديو شرح طريقة عمل البط المشوي المحشي فريك في الفرن وضحت فيه كل التفاصيل جربوها وهتحوز على اعجباكم.