انهاردة هشرح ليكم طريقة عمل خلطة خضرة القلقاس والوصفة دى خاصة بالقلقاس طبعا واللي هو نوع من انواع الخضار شبية بالبطاطس من فصيلة الدرنيات بنحتاج له فى نهاية الطبخة والخلطة عبارة عن كسبرة خضراء وثوم.
فى بعض الناس بتعملة بسلق لكن انا بفضلة كده بالكسبرة والثوم فقط جربوها ان شاء الله هاتعجبكم كتير على طريقتى.
ودى برضوا من الاشياء سابقة التجهيز انا بعمل منها كمية واحفظها فى التلاجة وعند الحاجة استخدمها. والكميات مفتوحة حسب الرغبة لكن خلوا بالكم يعنى حزمة كاملة من الكسبرة يادوب تعمل طبق صغير.
تحسوا انها كتير لكن لما نضعها على النار بتقل الكمية للنصف وهنشوف دلوقتى فى الطريقة.
المكونات والمقادير
- كسبرة خضراء.
- ثوم.
طريقة عمل خلطة خضرة القلقاس
- بنغسل الكسبرة كويس جدا ونتركها تجف من الماء نهائيا ونقوم بتقطيعها صغير جدا هى والثوم.
- نحضر حلة ونضع فيها معلقة كبيرة سمنة ولازم سمنة ولما تسخن نضع الكسبرة والثوم.
- وعلى نار هادية نقلبها الى ان تنشف.
- ملحوظة فى بعض الاوقات بتكون كمية الماء فى العروق كتيرة فلا تنشف بسهولة.
- ممكن تكتفى بمرحلة انها بدأت تنشف وتغير لونها.
- وفى الاخر نسخن الفرن كويس ونطفيه ونضعها فى صهد الفرن تنشف.
- ودة شكلها بعد ما نشفت نصفى السمنة منها فى الوعاء اللى هنحتفظ فيه بالخلطة.
- ثم نطحن الخلطة بظهر المغرفة او يد الهون حسب الرغبة.
- نسكبها على السمنة ونضعها فى الثلاجة تجمد شوية.
- وبعدين نقلبها كويس وشكلها النهائى بيكون كريمية وناعمة ومتجانسة.
- وعند عمل القلقاس ناخد منها مباشرة ونضع على القلقاس فى النهاية بتكون تحفة ورائعة.
- انا كمان بعملها كده بدون سلق لان السلق مش متوفر عندنا.