انهاردة هشرح لكم طريقة عمل مربي المشمش فى البيت بالصور والخطوات شرح كامل وكمان الشرح متصور بالفيديو فى اخر الوصفة كأنك فى مطبخى فتابعوا معايا.
المكونات والمقادير
- كيلو مشمش متنظف ومقطع.
- كيلو إلا ربع (750) جرام سكر عادي.
- معلقة صغيرة ملح ليمون والبديل لها اذا لم يتوفر عصير ليمونة.
طريقة عمل مربي المشمش
نضع السكر مع المشمش طبقات متبادلة في بولة عميقة ويغطي ويترك في الثلاجة من الليل للصبح.
يصبح بالشكل ده بيجيب المياه اللى فيه وبيكون فيه سائل بالشكل ده.
ملاحظين الماء دة ناتج من اضافة السكر إلى المشمش.
يعني إحنا مش هنضيف ماء نهائي ودى اهم حاجة ولازم تاخدوا بالكم منها.
نسكب الخليط في حلة عميقة ونضعه علي النار إلى أن يبدأ فى الغليان.
بيعمل رغوة بيضاء علي الوجه نشيلها بالمعلقة كويس وفي الأول تكون النار عالية الي ان يغلي.
ثم نخفض النار الي المتوسطة حتى يحتفظ المشمش باللون الاورانج (البرتقالى) الجميل وما يغمقش.
وبعد ما نشيل الرغوة نضيف معلقة ملح الليمون أو عصير الليمونة ونقلبها ونتركها تتركز.
وانا بحب اضيف نترة فانيليا كمان دي اختياري حسب الرغبة.
نحتفظ بالمربي بعد ما تبرد خالص في برطمان معقم كما بالصورة اول الوصفة. ويستعمل عند الحاجة وبالهنا والشفا.
شرح فيديو عمل مربي المشمش
وده فيديو شرح طريقة عمل مربي المشمش اتمنى ان ينال اعجابكم.