انهاردة هشرح لكم طريقة عمل صينية بقلاوة بالكنافة والكريمة بالصور والخطوات والتفصيل والشرح بالفيديو فى اخر الوصفة كأنك في مطبخي فتابعوا معايا.
المكونات والمقادير
- نصف لفة جلاش.
- ربع كيلو كنافة.
- باستري كريم بيتي.
- نصف كوب سمنة.
- مكسرات للتقديم حسب الرغبة.
- شربات او شيرة وتم شرح اعداده وتخزينه هنا.
طريقة الباستري كريم
كوب حليب علي النار اول ما يغلي هننزل عليه بالخلطة دي.
عبارة عن كوب حليب مع ربع كوب سكر مع ربع كوب دقيق مع بيضة ونترة فانليا.
نضربهم في الخلاط وننزل بيهم علي الحليب المغلي مع التقليب المستمر الي ان نحصل علي كريمة متماسكة.
دة شكل الباستري كريم.
طريقة عمل صينية بقلاوة بالكنافة والكريمة
الطريقة هنفرك الكنافة بعد ما نطلعها من الفريزر بمعلقتين سمنة ومعلقة سكر بودرة.
هندهن صينية مقاس 28 سمنة ونفرد فيها الكنافة ونكبسها كويس باليد.
نضع كمية من الكريمة طبقة متوسطة كدة فوق الكنافة بالشكل دة.
ثم نبدأ برص اوراق الجلاش وندهن بين كل ورقة فرشاة سمنة.
ونقطعها وندهن الوش سمنة تاني معلش الحلويات الشرقية بتاخد سمن كتير.
وطبعا نوع السمنة بتفرق في الطعم والمذاق انا هنا مستعملة سمنة نيوزيلاندي بتبقي تحفة وممكن بلدي جاموسي حسب الرغبة.
ندخلها فرن مشغل مسبقا علي نار عالية الي ان تستوي وتاخد لون ذهبي بالشكل دة.
تسقي بالشربات ونوسع تاني التقطيع علشان الشربات يوصل تحت للكنافة وتزين بالفستق حسب الرغبة.
وهنا شكل صينية بقلاوة بالكنافة والكريمة ويتم تقطيعها بعد أن تبرد وتقدم وبالهنا والشفا.
شرح فيديو صينية بقلاوة بالكنافة والكريمة
وده فيديو شرح طريقة عمل صينية بقلاوة بالكنافة والكريمة اتمنى ان ينال اعجابكم.