اليوم سأشرح لكم طريقة عمل نوع أخر من المربات وهى مربي الجزر والشرح بالخطوات والتفصيل.
المكونات والمقادير
- كيلو جزر مبشور.
- كيلو سكر.
- عصير ليمونة او ربع معلقة ملح ليمون.
- عود قرفة وقرنفل (اختيارى) بس بيخلو الطعم مميز.
طريقة عمل مربي الجزر
- هنجيب الجزر ونقشره ونغسله وهنحتاج نبشره طبعا ممكن نستعمل المبشرة العادية او لو متوفر محضرة الطعام هنا انا بستعمل محضرة الطعام بركب الشريحة الخاصة بالبشر.
- نقفل الغطاء ونبدأ ببشر كل كمية الجزر.
- نحضر طبق عميق ونضع السكر مع الجزر فى طبقات متبادلة يعنى طبقة من الجزر ثم طبقة من السكر مع مراعاة اخر طبقة تكون سكر.
- نضعه فى الثلاجة مدة لا تقل عن 6 ساعات او من الليل للصبح وبيكون شكله ان السكر بيدوب والجزر بيجيب المياه اللى فيه.
- نسكبه فى حلة كبيرة ونضعه على النار ولما يغلى لو عمل ريم (وش) ننزعه بالمعلقة ثم نضع الليمون ونتركها تستوى على نار متوسطة مع تقليبها من وقت لأخر حوالى نصف ساعة أو بمعنى أصح لما نختبر العسل بتاعها.
- وافضل طريقة لاختبار العسل نضع طبق زجاجى فى الفريزر لمدة ربع ساعة مثلا الى ان يصبح مشبر ومثلج، ثم ناخذ معلقة من العسل بتاع المربى ونضعه على الطبق ثم نميل الطبق لو العسل كرمش يعنى عمل تعريج كده او شكله يكون تقيل ده معناة ان المربى خلاص تمام كدة جاهزة.
- اما لو ميلنا الطبق وكان العسل سائل خالص نتركها كمان شوية ونرجع نعمل الاختبار ده تانى.
- وفى النهاية نضع القرفة والقرنفل ونقلبها تقليبه ونطفئ النار ونتركها تهدى تماما وتبرد وتعبأ فى برطمانات معقمة ونظيفة وتحفظ فى الثلاجة وبالهنا مع تحياتى.