مربي البلح المفروم السماني من اشهر المربات وليها كذا طريقة ممكن مفرومة وممكن كاملة ومحشية سودانى وممكن حلقات انا هنا عملتها مفرومة ندخل على الطريقة.
المكونات والمقادير
- كيلو بلح مقشر ومنزوع النوى.
- كيلو إلا ربع سكر.
- عصير 2 ليمونة.
- اعواد قرفة وقرنفل.
- ملعقة كبيرة عسل جلوكوز.
طريقة عمل مربي البلح المفروم
- نجيب البلح ونقشره ونقسمه الي نصفين ثم ننزع النواة.
- نفرم البلح فى المفرمة الكهربائية.
- نضع كمية السكر مع كمية البلح المفروم وعليها نفس الكمية ماء وعصير الليمون وعسل الجلوكوز في حلة على النار.
- ترفع على النار وهيطلع على الوش ريم ابيض نشيله كل ما يطلع.
- هنلاحظ ان لون المربى فاتح نخفض النار ونتركها تستوى كويس كل ما سيبناها على النار اكتر كل ما لونها احمر اكتر.
- فى المرحلة دى نضع القرفة والقرنفل وهنلاحظ تغير اللون.
- واخر مرحلة لما توصل للون البني يبقى كده تمام ولو لاقيناها لسه ما استوتش ممكن نزود ماء كمان.
- ونختبرها بأننا نضع معلقة منها على طبق بارد لو لاقينها تقيلة يبقى كدة تمام هنلاحظ تدرج اللون نتركها فى الحلة الى ان تبرد تماما ثم تعبأ فى برطمانات زجاج نظيفة ومعقمة وتقدم بالف هنا.