اليوم هعرض لكم نبذة مختصرة عن جهاز الميكروويف و استخدام الجهاز والاوانى المستخدمة فيه وفوائده واضراره، في البداية انواع الميكروويف كتيرة جدا فى السوق بس الافضل الماركات الغير صينية، انا بستخدم ميكروويف ماركة دايو كوري، وفيه فرق كبير بين الميكروويف وفرن الكهرباء فالميكروويف شئ وفرن الكهرباء شئ تاني خالص.
الادوات
- ميكروويف.
- أطباق ميكروويف زجاجية
استخدام وإستعمال جهاز الميكروويف
- يستعمل الميكرويف في طهي بعض الاطعمة.
- التسخين.
- يستخدم في فك التجميد عن الاطعمة.
- وفي بعض الانواع يوجد شواية للتحمير بس انا لا يوجد عندى شواية فمش هتكلم عليها لانى ما جربتش.
- واستخدام اخر تعقيم ببرونات الاطفال وتعقيم البرطمانات الزجاج.
- الطهي مثل الفشار او البيض العيون او سلق بعض الخضروات وغير ذلك.. لكن انا عن نفسي لا افضل استخدامه في الطهى لتجنب الاضرار الناتجة عن زيادة الوقت فى الطهي.
استخدام الميكروويف فى التسخين
- تسخين الخبز (العيش) ممتاز فى تسخينة بس بشرط لا نترك العيش مدة طويلة اقصي شئ 30 ثانية لان بعد كدة ممكن ينشف جدا لان الميكروويف بيسحب السوايل من الاطعمة.
- وكمان بنستخدمه فى تسيح الشيكولاتة الخام وبردوا نبدأ ب 30 ثانية ونطلعها نقلبها كويس ولو احتاجت تانى نزود بالتدريج لانها بعد كدة بتتحرق انتبهوا.
- وكمان ممكن نسخن اى شئ اخر من الاطعمة مثل الرز المكرونة الخضار المطبوخ البيتزا وغيرة كتير من الاطعمة.
استخدام الميكرويف فى تفكيك التجميد
- اما طريقة إستخدام الميكرويف فى فك التجميد عن الاطعمة مثل اللحوم والدجاج والاسماك.
- طبعا بيكون فية ازار كتير جدا مثلا اللي في الصورة فيه مفتاح مخصوص لتسخين السوايل فى الكوب وعلى حسب عدد الاكواب بتضغطى المفتاح اللى عليه رسمة الكوب يعنى لو هنحط كوب يبقي نضغط المفتاح مرة واحدة ولو 2 يبقي مرتين وهكذا.
- وفية مفتاح للشوربة ومفتاح للسمك ومفتاح لفك التجميد ومخصص مفتاح للحوم واخر للاسماك واخر للدواجن.
- وهناك مفاتيح لضبط درجات الحرارة ومفاتيح لزيادة الدرجة او تقليلها والاطعمة بالداخل. طبعا التقسيمات دى بتختلف من نوع للاخر.
ضبط درجة حرارة الميكرويف
حابة بس اوضح انك لو ضبطتى الميكروويف على درجة حرارة معينة ووقت معين وليكن دقيقتين وحسيتى انهم كتير عادى جدا لما توقفي التشغيل وتفتحى الميكروويف مش هيحصل حاجة خالص عادى جدا مش لازم تستنى لما الوقت ينتهى تمام كدة واقل وقت تبدئي بية 30 ثانيه.
الآوانى الممنوع وضعها فى الميكروويف
ممكن ناس كتير تستغرب من اللى بقوله فى الادوات اللى ممكن تدخل الميكرويف بس دة مش كلامى دة كتالوج الشركة بيقول كده.
- ممنوع منعا باتا استخدام الاشياء التى تحتوى على الذهب او السيلفر أو المعادن يعنى ممنوع منعا باتا استخدام ورق الفويل القصدير ولا اطباق القصدير استعمال المرة واحدة ابدا.
- وكذلك ممنوع استخدام الاطباق او الاكواب الزجاج اللي عليها رسومات او خط بالذهبي او الفضي دول اخطر حاجة وممنوعين نهائي.
- وايضا ممنوع منعا باتاً ترك معلقة او شوكة معدن فى الاطمعة واحنا بنسخنها.
- بعض الاطباق حتى لو زجاج شفاف بس بتكون لا تدخل الميكروويف ودة بنعرفة من اننا لو لاقينا علامة الميكروويف اللى هى شكل الميكروويف نفسة مرسوم يبقي دة بيدخل الميكروييف ولو مش مرسوم يبقي مش بيدخل.
- ممنوع منعاً باتاً وضع الحلل أو الطاسات أو أوانى الطهى داخل الميكروويف.
الآوانى المسموح بوضعها فى الميكرويف
مسموح استعمال الاطباق الفلين او الصيني بدون رسومات ذهبي ولا فضي. ومسموح بالاكواب الزجاج وكمان ممكن استعمال نايلون التغليف يعنى الاطعمة المغطاة بالنايلون تتدخل الميكرويف عادى.
وايضا العلب البلاستيك الخاصة بالميكروويف والزجاج الخاص بالميكروويف والصيني ونخلي بالنا فى بعض الاطباق حتى لو زجاج شفاف بس بتكون لا تدخل الميكروويف ودة بنعرفه من اننا لو لاقينا علامة الميكروويف اللى هى شكل الميكروويف نفسة مرسوم يبقي دة بيدخل وهكذا والعكس صحيح.
هل الميكرويف صحي وآمن؟ وما هى مميزاته؟
هبدأ بأهم ميزة للميكروويف وهي اختصار الوقت والتسخين الممتاز. طبعا بالرغم من كل الادوات اللى ممكن نستعملها فى الميكروويف لكن لو هنيجى للصحي والامن اننا نستخدم الزجاج فقط سواء علب او اطباق او اكواب تكون كلها زجاج. ودة لتقليل مخاطر استخدام الميكروويف لان البلاستيكات بتتفاعل مع الموجات الصادرة من الميكروويف ودة فى حد ذاته ممكن يسبب الامراض عافنا الله.
طريقة تنظيف الميكروويف
لتنظيف الميكروويف نحضر طبق عميق او بولة ونضع فيها عصير ليمون وخل وماء ونضعها بداخل الميكروويف ونشغلة لغاية ما تغلى المياه دى ونتركها تغلى شوية وبعدين نطلع البولة من الميكرويف ونكتفى بالبخار الناتج من غليان المياه بالخل والليمون بفوطة نظيفة مباشرة ننمسح الميكروويف من الداخل كويس ونغسل الطبق الرئيسي بتاعه عادى على الحوض بالماء وسائل التنظيف.
دة كان موجز مبسط لاستخدام الميكرويف واضرارة وفوائدة يارب اكون قدرت افيدكم بمعلوماتى البسيطة لا تنسونى بصالح دعائكم مع تحياتى (منى جاد) منوس ننوس.