انهاردة هشرح لكم طريقة عمل ساندويتش الفول النابت بالصور والخطوات وكمان شرح بالفيديو في اخر الوصفة للفول النابت كأنك في مطبخي والطريقة دى للفول من الطرق القديمة بس مش كل الناس بتعرفها، فتابعوا معايا الوصفة.
المكونات والمقادير
- كيلو فول تدميس كبير.
- شوربة لحم ان وجدت او ممكن بديل ماء مغلي ومكعبين مرقة دجاج.
- عصير ليمونة كبير.
- فلفل اسمر.
- ملح.
- 5 فصوص ثوم مفروم ناعم.
مكونات عمل الساندويتشات
- نحتاج الي سلطة مكونة من طماطم وبصل وبقدونس.
- عيش بلدى.
- زيت عادي او حار حسب الرغبة وممكن الاستغناء عنه.
طريقة عمل ساندويتش الفول النابت
اول خطوة لتنبيت الفول نفسه.
ننقع الفول من الليل للصبح في ماء.
ثم نصفيه من الماء تاني يوم ويوضع في مصفاة ويغطي بفوطة مطبخ مبللة بالماء.
وكل ما تقرب تنشف نبلها تاني بالماء وهكذا لمدة يومين.
الي ان نلاحظ ان حبات الفول نبتت من الجوانب بالشكل ده.
انا عن نفسي بحب اني اقشر الفول لكن طبعا ممكن يتعمل بالقشرة بتاعته حسب الرغبة.
هنا انا قشرت الفول ونضعه مباشرة في ماء بعصير ليمون للاحتفاظ بلونه الفاتح وحتي لا يتغير لونه.
في حلة علي النار نضع ملعقة سمنة ونشوح الثوم.
ثم نضيف الفول بعد ما نصفيه ونستمر في التشويح مع اضافة الفلفل الاسمر.
ثم نضيف الشوربة او الماء ومكعب المرقة وعصير الليمونة.
بس بصراحة بالشوربة احلي كتير.
ونتركه يستوي كويس جدا وكدة تمام حضرنا الفول النابت نفسه ونظبط الملح ويقدم كشوربة.
او نصفي جزء منها كويس ونعمله ساندوتشات في خبز بلدي.
بالشكل ده.
ويرش عليها زيت حسب الرغبة ويقدم بالف هنا لذيذ جدا جدا بجد.
شرح فيديو عمل ساندويتش الفول النابت
وده فيديو شرح طريقة عمل ساندويتش الفول النابت اتمنى ان ينال اعجابكم.