انهاردة هشرح لكم طريقة عمل مكرونة نجرسكو كرات اللحم بطعم خرافة بالصور والخطوات وكمان هيكون فيه شرح بالفيديو في اخر الوصفة كأنك في مطبخي فتابعوا معايا.
المكونات والمقادير
الكميات مفتوحة نزود او نقلل في الكميات مفيش مشكلة حسب الرغبة.
- 400 جرام ما يعادل كيس مكرونة اقلام (فرن) مسلوقة.
- 400 جرام لحمة مفرومة.
- بصلة مبشورة.
- من نصف كوب الي كوب جبنة موزاريلا حسب الرغبة.
- 3 ملاعق دقيق.
- 3 ملاعق سمنة.
- ملح.
- فلفل.
- كوب ونصف حليب.
- نصف كوب كريمة.
- كوب من ماء سلق المكرونة.
- ربع كوب زيتون.
- كوب مشروم فريش مقطع.
- 3 فصوص ثوم.
- ثوم بودر.
- بصل بودر.
طريقة عمل مكرونة نجرسكو كرات اللحم
اولا نحضر كرات اللحم ونضيف بصلة مبشورة وملح وفلفل وعصرة ليمون وبهارات مشكلة علي اللحم ونخلط كويس ونعملها كرات بالشكل دة.
نسلق المكرونة ونتركها علي جنب ونشيل كوب من ماء السلق نخليه هنستعمله في الوصفة.
وفي طاسة علي النار نضع ملعقة سمنة ونشوح فيها كرات الكفتة.
الي ان تتغير لونها ونضيف لها نصف كوب ماء ونتركها تستوي وتصفي نهائي من السوائل.
في المرحلة دي نضيف المشروم ونشوح مع كرات الكفتة.
ثم ننزل بالزيتون ونشوح ونترك الخليط علي جنب.
نيجي لتحضير الوايت صوص للنجرسكو.
في حلة علي النار نضيف ال 3 ملاعق سمن ثم نضيف الثوم المفروم ونشوح.
ثم نضيف الدقيق ولازم كمية الدقيق تكون متساوية مع كمية السمنة علشان يكون صوص ناعم وكريمي.
نشوح الدقيق شوية ثم نضيف الحليب والكريمة وماء السلق مرة واحدة علي طول مع تضبيط الملح والفلفل والثوم والبصل البودرة. وممكن كمان اضافة مكعب مرقة فورية ونستمر في التقليب الي ان نحصل علي خليط كريمى ناعم متجانس.
كدة عندنا المكونات كلها جاهزة هنبدأ بقي في تجميع كل المكونات مع بعض.
في نفس الحلة اللي عملنا فيها الصوص هنضيف كل المكونات المكرونة المسلوقة وخلطة كرات الكفتة والمشروم.
نقلب كل المكونات مع بعض.
ونصبها في طاجن فرن او صينية بايركس.
نضيف علي الوجه الجبنة الموزاريلا.
ندخلها الفرن تحت الشواية تاخذ لون ونرش رشة بقدونس علي الوجه وتقدم ساخنة.
وده شكلها النهائي بعد ما خرجت من الفرن ويارب تنال اعجابكم.
شرح فيديو عمل مكرونة نجرسكو كرات اللحم
وده فيديو شرح طريقة عمل مكرونة نجرسكو كرات اللحم اتمنى ان ينال اعجابكم.