انهاردة هشرح لكم طريقة عمل مجموعة اكلات دايت واطباق صحية متنوعة تكفي اسبوع بالصور والخطوات وكمان هيكون فيه شرح بالفيديو كأنك في مطبخي في اخر الوصفة فتابعوا معايا.
انواع اكلات صحية دايت
هنعمل انهاردة 5 انواع وجبات صحية:
- بيكاتا كفتة بالمشروم مع رز بسمتي وخضار سوتية.
- سلطة مكرونة بالدجاج صيني.
- أرز بسمتي مع دجاج صيني وخضار سوتية.
- كفتة مشوية مع خضار مشكل ورز بسمتي.
- استيك الدجاج مع مكرونة بالثوم وخضار سوتيه.
المكونات والمقادير
المقادير لعمل كل الوجبات تكفي شخصين لمدة اسبوع دي المقادير المشتركة في كل الوصفات.
- نصف كيلو لحم مفروم.
- كيلو إلا ربع صدور دجاج.
- 2 حبة جزر.
- 2 حبة كوسة.
- عدد 2 حبة بطاطا حمراء.
- نصف كوب فاصوليا خضراء.
- كوب مشروم فريش مقطع.
- ممكن اضافة الذرة الصفراء او البسلة حسب الرغبة.
- ملح همالايا.
- فلفل اسمر.
- بابريكا.
- ثوم بودر.
- بصل بودر.
- ورقة لورة مطحونة.
مقادير عمل المكرونة بالثوم
- 2 فص ثوم مفرومين.
- بصلة صغيرة مقطعة.
- حبة واحدة فلفل مقطع.
- حبة واحدة طماطم مقطعة مكعبات.
- كوب مكرونة اقلام.
- معلقة صغيرة زيت زيتون.
- ومن نفس تشكيلة البهارات السابقة.
مقادير عمل البيكاتا الكفتة بالمشروم
- كوب مشروم فريش.
- نصف كوب حليب خالي الدسم.
- معلقة صغيرة دقيق او نشا.
- فصين ثوم مفرومين.
مقادير عمل الكفتة المشوية
- بصل مفروم ناعم.
- بيضة واحدة.
- نصف كوب بقدونس.
- نصف شريحة توست اسمر.
- بهارات.
- وللكفتة المشوية نفس المقادير وهنزود مسحة زيت زيتون.
مقادير عمل الارز البسمتي
- كوب رز بسمتي.
- ماء للسلق.
- ملح.
- مكعب مرقة.
- فصين حبان.
- عود قرفة.
مقادير عمل استيك الدجاج
- صدور دجاج.
- مياه بصل.
- ليمون.
- تشكيلة بهارات.
- معلقة صغيرة زيت زيتون.
مقادير عمل الدجاج الصيني
- صدور دجاج مكعبات.
- معلقة صويا صوص.
- معلقة صغيرة عسل نحل.
- فصين ثوم مفرومين.
- معلقة صغيرة نشا.
- نصف كوب ماء.
- اصابع كوسة.
- جزر.
- فلفل ألوان.
- بصل.
طريقة عمل الخضار السوتيه
نقطع كل تشكيلة الخضار ونضعها في بولة في الميكرويف بدون اضافة اي مكونات اخري بتاخد 15 دقيقة وبتكون استوت.
طريقة عمل الارز البسمتي
نغلي ماء مضاف إليه مكعب مرقة وفصين حبان وعود قرفة ونضيف اليه كوب الأرز ونتركه يتسلق زي المكرونة بالضبط ونضيف ملح همالايا.
ويصفي من ماء السلق.
طريقة عمل المكرونة بالثوم
نسلق المكرونة في ماء وملح عادي جدا. ناخذ منها جزء نتركه جانبا هنستخدمه في سلطة المكرونة.
والجزء الاخر في حلة علي النار نضع معلقة صغيرة زيت زيتون ونشوح فيها فصين ثوم مفرومين مع فلفل وبصل وطماطم مكعبات حوالي معلقة كبيرة من كل نوع تشويحة كدة.
وننزل عليهم بالمكرونة ونقلب ونضبط الملح والفلفل الاسمر.
طريقة عمل بيكاتا الكفتة بالمشروم
نتبل اللحم المفروم ببصل وبقدونس مفروم وبهارات وبيضة لزيادة البروتين ونشكلها كرات.
نشوحها مع زيت زيتون ونضيف المشروم وفصين الثوم ونشوح.
ثم ننزل عليها بنصف كوب حليب خالي الدسم مضاف إليه معلقة صغيرة نشا او دقيق ونضبط الملح والفلفل وبس كدة.
طريقة عمل استيك الدجاج
نقطع الصدور الي شرائح رفيعة نشوحها في معلقة زيت زيتون تاخد صدمة علي نار عالية علي الجهتين ثم ننزل عليها بماء البصل والليمون وتشكيلة البهارات.
ونتركها تستوي.
طريقة عمل الدجاج الصيني
نتبل مكعبات الدجاج بتشكيلة البهارات مع عصرة ليمون.
نشوح الدجاج مع معلقة زيت زيتون والصويا صوص وعسل النحل والثوم ثم نضيف اليها كوب ماء ونتركها تستوي تماما ثم نضيف تشكيلة الخضار المقطع جوليان اصابع طولية ونضيف اليهم نصف كوب ماء مذوب فيه معلقة صغيرة نشا.
يصبح جاهز بهذا الشكل.
طريقة عمل اصابع الكفتة المشوية
نضيف الي اللحم المفروم بيضة مع بصل مفروم وعصرة ليمون وبقدونس مفروم وتوابل ونخلطها في الكبة.
تشكل اصابع طولية وتوضع في جريل مدهون مسحة بسيطة زيت زيتون وتشوح ثم يضاف اليها مقدار نصف كوب ماء ونتركها تستوي بالشكل دة.
تجميع الوجبات الصحية الدايت
نجمع بقي الوجبات في علب محكمة الغلق.
نخلط المكرونة المسلوقة اللي تركناها جانبا مع نصف كمية الدجاج الصيني وبكدة يبقي عملنا سلطة المكرونة.
نضيف في علبة اخري مقدار 3 ملاعق من الأرز البسمتى مع الكفتة المشوية وخضار سوتية.
في علبة اخري نضيف المكرونة بالثوم 3 ملاعق كبيرة و3 شرائح استيك دجاج مع خضار سوتية.
ونضيف في علبة اخرى 3 ملاعق ارز بسمتى مع خضار سوتية مع بيكاتا الكفتة بالمشروم.
في علبة اخرى نضيف 3 ملاعق ارز بسمتي مع دجاج صيني مع خضار.
ونحتفظ بالعلب في الثلاجة ونطلعها نسخنها في الميكروويف ونقدم بجانبها سلطة خضار طازجة.
شرح فيديو عمل اكلات صحية دايت
وده فيديو شرح طريقة عمل اكلات صحية دايت اتمنى ان ينال اعجابكم.