انهاردة هشرح لكم طريقة عمل الغريبة بكيس الحلوانى بالصور والخطوات وكمان هيكون فيه شرح بالفيديو في اخر الوصفة كأنك في مطبخي فتابعوا معايا.
المكونات والمقادير
- كيلو دقيق.
- نصف كيلو سمنة بلدى بيضاء.
- 200 جرام سكر ناعم بودرة.
- ذرة فانليا حسب الرغبة وممكن الاستغناء عنها.
طريقة عمل الغريبة بكيس الحلوانى
الطريقة علي غير المعتاد وما تستغربوش هي طريقة سهلة جدا ومضمونة.
هنضيف الثلاث مكونات مع بعض مرة واحدة في العجان.
السمنة تكون بدرجة حرارة المطبخ
نبدأ بخفق كل المكونات مع بعض ولو حابين نضيف فانليا حسب الرغبة.
نضيفها معاهم ونبدا بالخفق بالمضرب الكف.
هنلاحظ في الاول الخليط زى الرمل كده نستمر في الخفق حتي يتغير شكل الخليط ويبدأ بالتماسك.
نستمر الي ان نلاحظ ان العجينة اصبحت ناعمة وبتلزق بالشكل دة وماتخافوش زيادة الخفق بتخلي الغريبة ناعمة جدا ويكون سهل تشكيلها بكيس الحلواني.
بالشكل دة هنشكلها بالكيس بنشتغل بيها مباشرة.
ممكن بالتيب النجمة نعملها شكل وردة وممكن بالتيب السادة نعملها مدورة.
وهستعمل الملبس الفضي
وهنا دة كيس الحلواني اللي استعملته.
نبدأ بالتشكيل مباشرة علي صينية الفرن بدون اي دهان نهائي.
وهكذا الي ان ننتهي من المقدار.
نكون مشغلين الفرن من تحت علي درجة حرارة 120 الى 130.
وتوضع علي الرف الاوسط تاخد من 10 الى 15 دقيقة حسب فرنك.
الغريبة مش بتاخد لون اطلاقا يا دوب تكون شقرة من تحت بس.
بالشكل دة.
تترك علي الصواني لحد ما تبرد خالص علشان نعرف نشيلها وممكن لو فيه تكييف لو الجو حر نحط الصواني في غرفة مكيفة مش بتاخد وقت وبنشيلها بسهولة جدا.
وتقدم بالهنا.
شرح فيديو عمل الغريبة بكيس الحلوانى
وده فيديو شرح طريقة عمل الغريبة بكيس الحلوانى اتمنى ان ينال اعجابكم.